- 1
- (Na Rawiri, i tona ahua i rere ke ra i te aroaro o Apimereke; na peia ana ia, a haere ana.) Ka whakapaingia e ahau a Ihowa i nga wa katoa; he whakamoemiti tonu ta toku mangai ki a ia.
- 2
- Ka whakamanamana toku wairua ki a Ihowa: ka rongo te hunga mahaki, a ka hari.
- 3
- Kia whakanui tahi tatou i a Ihowa, kia whakateitei tahi hoki i tona ingoa.
- 4
- I rapu ahau i a Ihowa, a rongo mai ana ia ki a au, whakaorangia ana hoki ahau e ia i oku wehi katoa.
- 5
- I titiro atu ratou ki a ia, a kua mārama: kihai ano o ratou mata i whakama.
- 6
- I karanga atu tenei tangata iti, a whakarongo mai ana a Ihowa, whakaora ana i a ia i ona pouritanga katoa.
- 7
- E noho ana te anahera a Ihowa i tetahi taha, i tetahi taha, o te hunga e wehi ana i a ia, a e whakaora ana i a ratou.
- 8
- Whakamatauria, kia kite ai koutou i te pai o Ihowa: ka hari te tangata e whakawhirinaki ana ki a ia.
- 9
- Kia wehi ki a Ihowa, e tona hunga tapu: e kore hoki e hapa nga tangata e wehi ana i a ia.
- 10
- E hapa nga kuao raiona, e mate i te kai: te hunga ia e rapu ana ki a Ihowa, e kore ratou e hapa i tetahi mea pai.
- 11
- Haere mai, e nga tamariki, whakarongo ki a au: maku koutou e ako kia wehi ki a Ihowa.
- 12
- Ko wai te tangata e hiahia ana ki te ora, e whai ana kia maha nga ra, kia kite i te pai?
- 13
- Tiakina tou arero kei kino, ou ngutu kei korero hianga.
- 14
- Mawehe atu i te kino, mahia te pai; rapua te ata noho, whaia atu hoki.
- 15
- E tau ana nga kanohi o Ihowa ki te hunga tika; me ona taringa ki to ratou karanga.
- 16
- E hē ana te mata o Ihowa ki nga kai mahi kino, hei hatepe atu i a ratou i te whenua kei maharatia.
- 17
- E karanga ana te hunga tika, a e whakarongo mai ana a Ihowa: whakaorangia ana ratou e ia i o ratou whakapawera katoa.
- 18
- E tata ana a Ihowa ki te hunga ngakau marū: ka whakaorangia ano e ia te hunga wairua iro.
- 19
- He tini nga mate o te tangata tika: otira e whakaorangia ana ia e Ihowa i roto i te katoa.
- 20
- E tiakina ana e ia ona wheua katoa: e kore tetahi e whati.
- 21
- Ka whakamatea te tangata hara e te kino; a ka he te hunga e kino ana ki te tangata tika.
- 22
- E hokona ana e Ihowa nga wairua o ana pononga, e kore ano e he tetahi o te hunga e whakawhirinaki atu ana ki a ia.
Address: 
Phone: 
Email: