- 1
- (Na Rawiri.) Kaua e mamae atu ki te hunga kino, kaua e hae atu ki nga kai mahi i te hara.
- 2
- No te mea ka hohoro ratou te kotia, te peratia me te tarutaru, a ka memenge me he otaota hou.
- 3
- Whakawhirinaki ki a Ihowa, mahia te pai; a ka noho koe ki te whenua, ka ata kai marie hoki.
- 4
- Whakaahuareka atu ki a Ihowa, a ka homai e ia ki a koe ta to ngakau i hiahia ai.
- 5
- Tukua atu to ara ki a Ihowa; whakawhirinaki atu hoki ki a ia, a mana e mahi.
- 6
- Mana hoki e whakaputa mai tou tika, ano he māramatanga, te whakaritenga hoki o tau whakawakanga me te mea ko te ra e tu ana.
- 7
- Okioki ki a Ihowa, tatari marie ki a ia: kei mamae atu koe ki te tangata e hohoro ana i tana ara, ki te tangata e taea ana e ia nga whakaaro kino.
- 8
- Kati te riri, whakarerea hoki te arita; kei mamae koe, kei mahi i te kino.
- 9
- No te mea ka hatepea atu te hunga kino: te hunga ia e tatari ana ki a Ihowa, ka riro i a ratou te whenua.
- 10
- Kia potopoto ake nei hoki, a ka, kore noa iho te hunga kino: ae ra, ka ata tirohia e koe tona wahi, a kore kau noa iho.
- 11
- Otira ka riro mai te whenua i te hunga mahaki; a ka hari ratou i te roa o te ata noho.
- 12
- E whakangarahu ana te tangata kino mo te tangata tika: pakari ana ona niho ki a ia.
- 13
- Ka kata te Ariki ki a ia, no te mea ka kite ia e tata ana tona ra.
- 14
- Kua unuhia te hoari e te hunga hara, kua piko ta ratou kopere, hei turaki i te rawa-kore, hei kohuru i te hunga e tika ana i te ara.
- 15
- Ka tapoko atu ta ratou hoari ki o ratou ngakau: a ka whatiia a ratou kopere.
- 16
- Engari te wahi iti a te tangata tika i nga taonga o nga tangata hara tokomaha.
- 17
- Ka whatiia hoki nga ringaringa o te hunga hara: u tonu ia i a Ihowa te hunga tika.
- 18
- E matau ana a Ihowa ki nga ra o te hunga tika: a ka pumau to ratou kāinga ake ake.
- 19
- E kore ratou e whakama i te wa o te he, ka makona ano ratou i nga ra o te hemo-kai.
- 20
- Ka ngaro ia te hunga hara, a ka rite nga hoa riri a Ihowa ki te ngako reme: ka mahea atu ratou; ka mahea atu me he paowa.
- 21
- E tango ana te tangata hara i te taonga tarewa, kahore hoki ana utu mai: te tangata tika ia he aroha tana, he homai.
- 22
- Ka riro mai hoki te whenua i āna e manaaki ai; ka hatapea atu ano āna e kanga ai.
- 23
- E whakatikaia ana nga hikoinga o te tangata tika e Ihowa: e whakaahuareka ana ano ia ki tona ara.
- 24
- Ahakoa hinga ia, e kore ia e tino takoto rawa; no te mea e whakamaua ake ana tona ringaringa e Ihowa.
- 25
- He tamariki ahau i mua, a kua koroheketia nei, heoi, kahore ahau i kite i te tangata tika e whakarerea ana, i ona uri hoki e pinono taro ana.
- 26
- He atawhai tonu tana, he ohaoha: ka manaakitia ano hoki ona uri.
- 27
- Whakarerea te kino, mahia te pai, ka noho tonu ai.
- 28
- No te mea e aroha ana a Ihowa ki te whakarite whakawa: e kore ano e whakarerea tona hunga tapu e ia; e tiakina tonutia ana ratou ake ake; otiia ka hatepea atu nga uri o te hunga hara.
- 29
- Ka riro mai te whenua i te hunga tika, ka nohoia hoki a reira e ratou ake ake.
- 30
- He kupu mohio ta te mangai o te tangata tika; he whakarite whakawa ano ta tona arero e korero ai.
- 31
- Kei tona ngakau te ture a tona Atua; e kore e paheke tetahi o ona hikoinga.
- 32
- E tau mai ana te titiro a te tangata hara ki te tangata tika, a e whai ana kia whakamatea ia.
- 33
- E kore ia e waiho atu ki tona ringaringa e Ihowa: e kore ano hoki ia e whakahe i a ia ina whakawakia.
- 34
- Tāria a Ihowa, kia mau ki tona ara, a ka whakanuia koe e ia, ka whakawhiwhia hoki ki te whenua: e hatepea atu te hunga hara, ka kite koe.
- 35
- I kite ahau i te tangata hara e kake ana, e tautorotoro ana me te puriri matomato.
- 36
- Heoi, pahure noa atu ia, a, kore kau noa iho; ae, i rapua ia e ahau, a kihai i kitea.
- 37
- Maharatia te tangata tika, tirohia iho te tangata tutika; no te mea he marietanga te tukunga iho ki tena tangata.
- 38
- Ka ngaro ngatahi ia te hunga kino: te tukunga iho ki te hunga kino, ka hatepea atu ratou.
- 39
- Na Ihowa ia te whakaoranga o te hunga tika: ko ia to ratou kaha i te wa o te he.
- 40
- Ma Ihowa ratou e awhina, ko ia hoki hei tauarai mo ratou: ko ia hei tauarai mo ratou ki te hunga kino, a ka whakaorangia ano ratou e ia, mo ratou ka whakawhirinaki atu ki a ia.
Address: 
Phone: 
Email: