- 1
- (Ki te tino kai whakatangi. He himene na Rawiri.) I tatari marie ahau ki a Ihowa: a anga mai ana ia ki a au, whakarongo mai ana ki taku karanga.
- 2
- Nana ano hoki ahau i tango ake i te poka whakamataku, i roto i te paru taoruoru; a whakaturia ana e ia oku waewae ki runga ki te kohatu, whakaukia ana e ia aku hikoinga.
- 3
- A homai ana e ia he waiata hou ki toku mangai, he whakamoemiti ki to tatou Atua: he tokomaha e kite, a ka wehi, ka whakawhirinaki ai ki a Ihowa.
- 4
- Ka hari te tangata kua waiho nei e ia a Ihowa hei whakawhirinakitanga mona: a kahore e tahuri atu ki te hunga whakakake, ki te hunga hoki e peka atu ana ki te teka.
- 5
- E Ihowa, e toku Atua, he tini au mahi whakamiharo i mahia e koe, me au whakaaro ki a matou; e kore e taea te korero whakatepe atu ki a koe: me i mea ahau kia whakakitea, kia korerotia, e kore e taea te tatau.
- 6
- Kihai i matenuitia e koe te patunga tapu, me te whakahere; pokaia ana e koe oku taringa: kihai koe i mea mai ki te tahunga tinana me te whakahere hara.
- 7
- Na, ko taku meatanga atu, Tenei au te haere atu nei: kei roto i te pukapuka te tuhituhinga moku.
- 8
- Ko taku pai ko te mea i tau e pai ai, e toku Atua: ae ra, kei roto i toku ngakau tau ture.
- 9
- Kua kauwhautia e ahau te tika i roto i te whakaminenga nui: nana, kihai i kopia oku ngutu, tena koe te matau ana, e Ihowa.
- 10
- Kihai i hipokina e ahau tou tika i roto i toku ngakau; kua korerotia e ahau to pono me tau whakaoranga: kihai i hunā e ahau to aroha me to pono i te whakaminenga nui.
- 11
- Kei kaiponuhia mai tou aroha ki a au, e Ihowa: ma to atawhai me to pono ahau e tiaki i nga wa katoa.
- 12
- Ta te mea kua karapotia ahau e nga kino e kore e taea te tatau: mau pu ahau i aku kino, tē ahei te titiro ake; he tini ke i nga makawe o toku mātenga: a hemo iho toku ngakau.
- 13
- Kia pai koe, e Ihowa, ki te whakaora i a au; e Ihowa, hohoro ki te awhina i a au.
- 14
- Kia whakama kia pororaru ngatahi te hunga e rapu ana i toku wairua kia whakamatea: kia whakahokia ki muri, kia whakama hoki te hunga e hiahia ana kia he ahau.
- 15
- Kia hunā, hei utu mo to ratou whakama te hunga e mea mai ana ki a au, Ha, ha.
- 16
- Kia hari, kia koa ki a koe te hunga katoa e rapu ana i a koe; kia mea tonu te hunga e pai ana ki tau whakaoranga, Kia whakanuia a Ihowa.
- 17
- Ko au ia, he iti, he rawa-kore; heoi e whakaaro mai ana ano te Ariki ki a au: ko koe toku awhina, me toku kai whakaora; kaua ra e whakaroa, e toku Atua.
Address: 
Phone: 
Email: