- 1
- (He himene na Ahapa.) Kua puaki te kupu a te Atua kaha, a Ihowa, a karangatia ana e ia te whenua i te putanga mai o te ra, tae noa atu ano ki tona torengitanga.
- 2
- Kua tiaho mai te Atua i roto i Hiona, i te tino o te ataahuatanga.
- 3
- Ka haere mai to tatou Atua, e kore ano e wahangu: ka kai te kapura i tona aroaro, a ka hukerikeri te awha ki tetahi taha ona, ki tetahi taha.
- 4
- Ka karangatia e ia nga rangi i runga, me te whenua hoki, ki te whakaritenga whakawa mo tona iwi.
- 5
- Huihuia mai ki a au toku hunga tapu, te hunga i whakarite kawenata ki a au i runga i te patunga tapu.
- 6
- A ma nga rangi e whakakite tona tika: ko te Atua ake nei hoki te kai whakariterite whakawa. Hera.
- 7
- Whakarongo, e aku tangata, a ka korero atu ahau, e Iharaira, a ka whakaatu atu ahau ki a koe; Ko ahau te Atua, ko tou Atua.
- 8
- E kore ahau e riri atu ki a koe mo au patunga tapu, mo au tahunga tinana ranei, kia meatia tonutia ki toku aroaro.
- 9
- E kore ahau e tango i tetahi puru i roto i to whare, i etahi koati toa i roto i o taiepa.
- 10
- Naku nei hoki nga kirehe katoa o te ngahere, nga kararehe i runga i te mano o nga pukepuke.
- 11
- E matau ana ahau ki nga manu katoa o nga maunga; naku ano nga kirehe o te parae.
- 12
- Me he mate hiakai toku, e kore ahau e korero atu ki a koe: noku nei hoki te ao, me ona tini mea.
- 13
- E kai koia ahau i nga kikokiko o nga puru? e inu ranei i nga toto o nga koati?
- 14
- Ko te whakawhetai hei patunga tapu mau ki te Atua; whakamanā hoki au kupu taurangi ki a te Runga-rawa.
- 15
- A karanga mai ki a au i te ra o te he: maku koe e whakaora, a ka whakakororiatia ahau e koe.
- 16
- Ki te tangata hara ia ka mea te Atua; He aha mau te whakapuaki i aku tikanga, te whakahua ranei i taku kawenata e tou mangai?
- 17
- Kua kino nei hoki koe kia akona, a e akiri ana i aku kupu ki muri i a koe.
- 18
- I to kitenga i te tahae, na whakaae ana koe ki a ia; a whai tahi ana me te hunga puremu.
- 19
- Kua tukua e koe to mangai ki te kino; a e tito hianga ana to arero.
- 20
- Noho ana koe, a korerotia kinotia ana e koe to teina: ngauatuaratia ana e koe te tamaiti a to whaea.
- 21
- Ko āu mahi enei, a wahangu tonu ahau; i mea koe he pena pu ahau me koe: ka riria koe e ahau, ka whakararangitia ano aua mea ki to aroaro.
- 22
- Na, whakaaroa tenei, e te hunga kua wareware ki te Atua; kei haehaea e ahau, a kahore he kai whakaora.
- 23
- Ko te whakamoemiti te patunga tapu e whai kororia ai ahau: a ka whakakitea e ahau te whakaoranga a te Atua ki te tangata e tika ana tana whakahaere.
Address: 
Phone: 
Email: