- 1
- (Ki te tino kai whakatangi Nekinoto. He Makiri, na Rawiri.) E te Atua, tahuri mai tou taringa ki taku inoi: kei whakangaro atu koe, ina tangi atu ahau.
- 2
- Anga mai ki a au, whakahokia mai hoki he kupu ki a au: pokaikaha noa iho ahau i a au e tangi nei, e hamama nei;
- 3
- I te reo hoki o te hoa riri, i te tukinotanga a te tangata kino: no te mea e utaina ana e ratou te hara ki runga ki a au, a e kino ana ki a au, e riri ana.
- 4
- Mamae pu toku ngakau i roto i a au: kua taka ki runga ki a au nga wehi whakamate.
- 5
- Kua pa ki a au te mataku me te wiri: a ngaro iho ahau i te ihiihi.
- 6
- Na, ko taku meatanga atu, Aue, tē whai pakau ahau me he kukupa; penei ka rere atu ahau, a ka whai okiokinga.
- 7
- Katahi au ka rere atu ki tawhiti; a noho rawa atu i te koraha. Hera.
- 8
- Ka hohoro taku rere atu i te hau, i te awha.
- 9
- Whakangaromia, e te Ariki, wehea o ratou arero; kua kitea hoki e ahau te tukinotanga, me te tutu o roto o te pa.
- 10
- Haereere ana ratou i te ao, i te po, i runga i ona taiepa, a tawhio noa: he kino kei roto, he tangi hoki.
- 11
- He hara kei waenganui ona: kahore ona ara e mahue i te tinihanga, i te hianga.
- 12
- Ehara hoki i te hoa riri nana ahau i tawai; penei e taea e ahau te whakaririka: ehara hoki i te hoa whawhai noku i whakakake mai ki a au; penei kua piri atu ahau, kei kitea e ia.
- 13
- Nau ia, na te tangata i rite ki a au, na toku takahoa, na taku i mohio ai.
- 14
- Ahuareka tonu ta taua korerorero; haere tahi ana hoki taua i roto i te ropu ki te whare o te Atua.
- 15
- Kia mau ratou i te mate, kia heke ora atu ki te rua tupapaku: he hara hoki kei o ratou nohoanga, kei waenganui i a ratou.
- 16
- Ko ahau, ka karanga atu ahau ki te Atua: a ma Ihowa ahau e whakaora.
- 17
- I te ahiahi, i te ata, i te poutumarotanga hoki, ka inoi ahau, ka tangi atu hoki: a ka whakarongo mai ia ki toku reo.
- 18
- Whakaorangia mai ana e ia toku wairua ki runga ki te rangimarie; i a au e whakaekea ana: he tokomaha hoki oku hoa.
- 19
- Ka whakarongo mai te Atua, no tua iho nei tana nohoanga, a ka whakawhiu i a ratou. Hera. Kahore o ratou whakawhitiwhitinga, koia ratou tē wehi ai i te Atua.
- 20
- Kua totoro atu ona ringa ki te hunga kua mau nei ta ratou rongo ki a ia; kua whakatakā e ia tana kawenata.
- 21
- Maeneene atu tona mangai i te pata, he whawhai ia kei roto i tona ngakau: ngawari atu āna kupu i te hinu, kaore, he hoari kua oti te unu.
- 22
- Makā atu ki runga ki a Ihowa to pikaunga, a mana koe e whakau ake: e kore e tukua e ia te hunga tika kia whakangaueuetia ake ake.
- 23
- Māu ia ratou e mea, e te Atua, kia heke iho ki te poka o te mate: e kore nga tangata toto, nga tangata hianga e tutuki ki te hawhe o o ratou ra; ko au ia ka whakawhirinaki atu ki a koe.
Address: 
Phone: 
Email: