- 1
- (He inoi na Rawiri.) Whakatitahatia iho tou taringa, e Ihowa, whakahokia mai he kupu ki a au; he ware hoki ahau, he rawa-kore.
- 2
- Tiakina toku wairua: e tapu ana hoki ahau; mau, e toku Atua, e whakaora to pononga e whakawhirinaki atu nei ki a koe.
- 3
- Tohungia ahau, e te Ariki: e karanga atu nei hoki ahau ki a koe i nga ra katoa.
- 4
- Whakaharitia te wairua o to pononga; ka ara atu nei hoki toku wairua, e te Ariki, ki a koe.
- 5
- E pai ana hoki koe, e te Ariki, e ngawari ana: e ranea ana hoki tau mahi tohu ki te hunga katoa e karanga atu ana ki a koe.
- 6
- Tahuri mai tou taringa, e Ihowa, ki taku inoi: whakarongo mai hoki ki toku reo karakia.
- 7
- Ka karanga atu ahau ki a koe i te ra o toku pouritanga: e whakahoki kupu mai hoki koe ki a au.
- 8
- Kahore he rite mou, e te Ariki, i roto i nga atua: kahore hoki he rite mo au mahi.
- 9
- Ka haere mai nga iwi katoa i hangā e koe, a ka koropiko ki tou aroaro, e te Ariki, ka whakakororia hoki i tou ingoa.
- 10
- E nui ana hoki koe, a e mahi ana i nga mea whakamiharo; ko koe anake te Atua.
- 11
- Whakaakona ahau ki to ara, e Ihowa; ka haere ahau i runga i to pono: whakatapatahitia toku ngakau, ki te wehi i tou ingoa.
- 12
- Ka whakamoemiti katoa toku ngakau ki a koe, e te Ariki, e toku Atua: ka whakakororia ano i tou ingoa ake ake.
- 13
- E nui ana hoki tau mahi tohu ki a au: a kua whakaorangia e koe toku wairua i te reinga i raro riro.
- 14
- E te Atua, kua whakatika mai ki a au te hunga whakakake: kua whai mai ano te huihuinga o te hunga tutu kia whakamatea ahau; kahore ano hoki koe e waiho i to ratou aroaro.
- 15
- Ko koe ia, e te Ariki, he Atua atawhai, he Atua tohu tangata: e puhoi ana ki te riri, e hua ana te mahi tohu me te pono.
- 16
- Tahuri mai ki a au, tohungia hoki ahau: homai tou kaha ki to pononga, whakaorangia te tamaiti a to pononga wahine.
- 17
- Whakakitea mai ki a au he tohu mo te pai: kia kite ai te hunga e kino ana ki a au, kia whakama ai: nou i awhina mai, e Ihowa, i ahau, i whakamarie hoki i a au.
Address: 
Phone: 
Email: