- 1
- (Ki te tino kai whakatangi Mutu-rapena. He himene na Rawiri.) Ka whakapaua toku ngakau, e Ihowa, ki te whakamoemiti ki a koe, ka korerotia e ahau au mahi whakamiharo katoa.
- 2
- Ka koa ahau ka whakamanamana ki a koe, ka himene atu ahau ki to ingoa, e te Runga-rawa.
- 3
- I te hokinga whakamuri o oku hoa riri, tūtūki ana ratou, ngaro iho i to aroaro.
- 4
- Nau hoki i whakatika aku korero me taku whakawa; i runga koe i te torona e noho ana, e whakariterite tika ana.
- 5
- Kua whakatupehupehu atu koe ki nga tauiwi, hunā ana e koe te tangata kino, horoia atu ana to ratou ingoa ake ake.
- 6
- Te hoa riri, mutu pu ratou, he whakangaromanga oti tonu iho: kua hunā ano hoki e koe nga pa, ngaro iho te whakamaharatanga atu.
- 7
- Ko Ihowa ia e pumau ana ake ake: kua whakapaia e ia tona torona mo te whakarite whakawa.
- 8
- A e whakarite whakawa ia mo te ao i runga i te tika, ka whakatakoto tikanga ia mo nga iwi i runga i te pono.
- 9
- Hei pa teko ano a Ihowa mo te tangata e tukinotia ana, hei pa teko i nga wa o te he.
- 10
- A ka whakawhirinaki ki a koe te hunga e matau ana ki to ingoa: no te mea hoki e kore e whakarerea e koe, e Ihowa, te hunga e rapu ana i a koe.
- 11
- Himene atu ki a Ihowa, e noho nei i Hiona: whakapuakina i waenganui i nga iwi ana mahi.
- 12
- Ka whakataki toto ia, ka mahara ia ki a ratou: e kore e wareware i a ia te karanga a te hunga iti.
- 13
- Tohungia ahau, e Ihowa; titiro mai ki taku mate i te hunga e kino mai ana ki a au, e te kai whakaara i a au i nga tatau o te mate:
- 14
- Kia whakakitea katoatia ai e ahau o whakamoemititanga i nga tatau o te tamahine o Hiona: ka hari atu ahau ki tau whakaoranga.
- 15
- Kua tapoko nga tauiwi ki te rua i keria e ratou: kua mau to ratou waewae i roto i te kupenga i hunā e ratou.
- 16
- E matauria ana a Ihowa ki te whakawakanga e whakaritea ana e ia: he mahanga mo te tangata kino te mahi a ona ringa. Hikaiono. Hera.
- 17
- Ka whakaangā ketia nga tangata kino ki te reinga, me nga iwi katoa e wareware ana ki te Atua.
- 18
- E kore hoki e warewarea tonutia te tangata rawa-kore: e kore e taka tonu atu ta te hunga iti i tumanako atu ai.
- 19
- E ara, E Ihowa, kei riro i ta te tangata: kia whakaritea mai te whakawa o nga tauiwi i to aroaro.
- 20
- E Ihowa, meinga ratou kia wehi: kia matau ai nga tauiwi he tangata nei ano ratou. Hera.
Address: 
Phone: 
Email: