- 1
- Na, i te tu ahau i te one o te moana, a ka kite ahau i tetahi kararehe e haere ake ana i te moana, e whitu ona mahunga tekau nga haona, kotahi hoki tekau nga karauna i runga i ona haona, a i runga i ona mahunga ko te ingoa kohukohu.
- 2
- A rite tonu te kararehe i kite ai ahau ki te reparo, ona waewae, kei o te pea, tona mangai, kei te mangai o te raiona: a ka hoatu e te tarakona tona kaha ki a ia, tona torona, he nui ano te mana.
- 3
- A i kite ano ahau i tetahi o ona mātenga me te mea kua marū, he mea e mate rawa ai; heoi kua ora ia i tona patunga e mate ai ia: na, kei te miharo te ao katoa i muri mai o te kararehe.
- 4
- Na, koropiko ana ratou ki te tarakona nāna nei i hoatu te mana ki te kararehe: koropiko ana hoki ki te kararehe, i mea ratou, Ko wai te rite ana ki te kararehe? Ko wai te kaha ana ki te whawhai ki a ia?
- 5
- A i hoatu ano ki a ia he mangai, he korero nui he korero kohukohu nei tana korero; i hoatu ano hoki ki a ia he kaha e mahi ai ia, a taka noa nga marama e wha tekau ma rua.
- 6
- A ka puaki i tona mangai he kohukohu ki te Atua, he kohukohu ki tona ingoa, ki tona nohoanga, ki te hunga hoki e noho ana i te rangi.
- 7
- I tukua ano ki a ia kia whawhai ki te hunga tapu, kia taea hoki ratou e ia: i hoatu ano ki a ia, he mana ki nga hapu katoa, ki nga reo, ki nga iwi.
- 8
- Ka koropiko ano hoki ki a ia te hunga katoa e noho ana i te whenua, kahore nei o ratou ingoa i tuhituhia ki te pukapuka ora a te Reme, no te timatanga iho ra ano o te ao nei tona whakamatenga.
- 9
- Ki te mea he taringa to tetahi, kia rongo ia.
- 10
- Te tangata e hopu taurekareka, ka riro ia hei taurekareka: te tangata e patu ana ki te hoari, ka patua ano ia ki te hoari. Ko te manawanui tenei me te whakapono o te hunga tapu.
- 11
- I kite ano ahau i tetahi atu kararehe e haere ake ana i roto i te whenua; e rua ona haona rite tonu ki o te Reme, a i rite ki ta te tarakona tana korero.
- 12
- Kei a ia ano nga mana katoa o te kararehe tuatahi hei mahi ki tona aroaro, e whakamea ana hoki ia i te whenua me te hunga hoki e noho ana i reira kia koropiko ki te kararehe tuatahi, kua ora nei tona patunga e mate ai ia.
- 13
- He nui hoki nga tohu e meatia ana e ia, e mea ana ia i te kapura kia heke iho i te rangi ki te whenua i te aroaro o nga tāngata,
- 14
- E whakapohehe ana ano ia i te hunga e noho ana i te whenua, ki nga tohu ka hoatu nei ki a ia kia mahia ki te aroaro o te kararehe; e mea ana ia ki te hunga e noho ana ki te whenua, kia hangā he whakapakoko mo te kararehe i patua nei ki te hoari, a kua ora ano.
- 15
- I hoatu ano ki a ia kia hoatu he wairua ki te whakapakoko o te kararehe, e korero ai te whakapakoko o te kararehe, e mea ai hoki i te hunga e kore e koropiko ki te whakapakoko o te kararehe kia whakamatea.
- 16
- I mea ano hoki ia i te hunga katoa, i te iti, i te rahi, i te hunga whai taonga, i te hunga rawakore, i nga rangatira, i nga pononga, kia meatia ki a ratou he tohu ki o ratou ringaringa matau, ki o ratou rae ranei:
- 17
- Kia kaua hoki tetahi e hoko mai e hoko atu ranei, ko te tangata anake kei a ia nei te tohu, te ingoa ranei o te kararehe; te whika ranei o tona ingoa.
- 18
- Tenei te matauranga. Ma te tangata whai whakaaro e tatau te whika o te kararehe: he whika tangata hoki; a, tona whika, E ono rau e ono tekau ma ono.
Address: 
Phone: 
Email: