- 1
- I kite ano ahau, na, he Reme e tu ana i Maunga Hiona, a kotahi rau e wha tekau ma wha mano ona hoa, kua tuhituhia te ingoa o tona Matua ki o ratou rae.
- 2
- Na, ka rongo ahau i te reo i te rangi, tona rite kei te haruru o nga wai maha, kei te haruru ano o te whatitiri nui: i rongo ano ahau i te reo o nga kai whakatangi hāpa e whakatangi ana i a ratou hāpa:
- 3
- A ta ratou waiata me te mea he waiata hou i mua i te torona, i mua hoki i nga mea ora e wha, i nga kaumatua ano hoki: e kore hoki e taea e tetahi te ako taua waiata, ko nga mano anake kotahi rau e wha tekau ma wha, kua oti nei te hoko i runga i te whenua.
- 4
- Ko te hunga tenei kahore nei i poke i te wāhine; he wahina hoki ratou. Ko te hunga tenei e aru ana i te Reme ki nga wahi e haere ai ia. He mea hoko enei i roto i nga tāngata he matamuatanga ki te Atua ki te Reme hoki.
- 5
- A kahore he tinihanga i mau i roto i o ratou mangai: he koha kore hoki ratou i mua i te torona o te Atua.
- 6
- A i kite ano ahau i tetahi atu anahera e rere ana i waenganui o te rangi, kei a ia te rongo pai mau tonu hei kauwhau māna ki te hunga e noho ana i te whenua, ki nga iwi katoa, ki nga hapu, ki nga reo, ki nga huihuinga tāngata;
- 7
- He nui tona reo ki te mea mai, Kia wehi koutou ki te Atua, hoatu ki a ia he kororia; kua tae mai hoki te haora e whakarite whakawa ai ia; koropiko atu hoki ki te Kai hanga o te rangi, o te whenua, o te moana, me nga puna wai.
- 8
- A i aru mai ano tetahi atu anahera, i mea, Kua horo, kua horo a Papurona, te pa nui, i whakainu nei i nga tauiwi katoa ki te waina o te riri o tana puremutanga.
- 9
- A i aru mai ano te toru o nga anahera i a raua, nui atu tona reo ki te mea mai, Ki te koropiko tetahi ki te kararehe ki tona whakapakoko hoki, a ka tango i te tohu ki tona rae, ki tona ringaringa ranei,
- 10
- E inu ano ia i te waina o te riri a te Atua, e ringitia nei he mea whakananu kore ki roto ki te kapa o tona riri; e whakamamaetia hoki ia i roto i te kapura i te whanariki, i te aroaro o nga anahera tapu, i te aroaro hoki o te Reme:
- 11
- A kake ana te paoa o to ratou whakamamaetanga, ake ake ake: kahore hoki he okiokinga i te ao i te po, mo te hunga e koropiko ana ki te kararehe ki tona whakapakoko hoki, mo te tangata hoki e tango ana i te tohu o tona ingoa.
- 12
- Ko te manawanui tenei o te hunga tapu: tenei te hunga e pupuri ana i nga ture a te Atua, i te whakapono hoki o Ihu.
- 13
- A ka rongo ahau i tetahi reo i te rangi e mea mai ana ki a au, Tuhituhia, Ka hari nga tupapaku e mate nei i roto i te Ariki i nga wa i muri nei: Ae ra, e ai ta te Wairua, kia okioki ai ratou i a ratou mahi; na, e aru tahi a ratou mahi i a ratou.
- 14
- I titiro ano ahau, na, he kapua ma, a i runga i te kapua tetahi e noho ana, tona rite kei te Tama a te tangata, a i runga i tona mahunga he karauna koura, i roto ano i tona ringaringa he toronaihi koi.
- 15
- Na, ko te putanga mai o tetahi atu anahera i roto i te whare tapu, he nui tona reo ki te karanga ki tera e noho ana i runga i te kapua, Akina iho to toronaihi, kotia: kua tae hoki te wa e kokoti ai koe; kua maroke hoki te witi o te ao.
- 16
- Katahi tera e noho ana i runga i te kapua ka aki iho i tana toronaihi ki te whenua, a ka kotia te whenua.
- 17
- A ka puta mai ano he anahera i roto i te whare tapu i te rangi, he toronaihi koi ano hoki tana.
- 18
- Na, ka puta mai ano tetahi atu anahera i roto i te āta, kei a ia he mana ki te kapura; he nui tona reo ki te karanga ki tera i te toronaihi koi, i mea ia, Akina iho to toronaihi koi, whakiia nga tautau waina o te whenua; kua maoa hoki ona karepe.
- 19
- Na, akina atu ana tana toronaihi e te anahera ki te whenua, whakiia ana e ia te waina o te whenua, pangā ana e ia ki te takahanga nui o te riri a te Atua.
- 20
- Na, ka takahia te takahanga i waho o te pa, a puta ake ana he toto i roto i te takahanga, tae noa ake ki nga paraire o nga hoiho, a taea noatia nga paronga kotahi mano e ono rau.
Address: 
Phone: 
Email: