- 1
- A muri iho i enei mea ka kite ahau tokowha nga anahera, e tu ana i nga pito e wha o te whenua, e pupuri ana i nga hau e wha o te whenua, kia kaua e pupuhi te hau ki runga ki te whenua, kia kaua ki te moana, kia kaua ki nga rakau katoa.
- 2
- A i kite ano ahau i tetahi atu anahera e haere ake ana i te putanga mai o te ra, kei a ia te hiri a te Atua ora: nui atu tona reo ki te karanga ki nga anahera tokowha, i tukua nei ki a ratou kia meatia he kino ki te whenua ki te moana,
- 3
- E mea ana, Kaua e meatia he kino ki te whenua, kaua hoki ki te moana, kaua hoki ki nga rakau; kia hiritia ra ano e matou nga rae o nga pononga a to tatou Atua.
- 4
- A i rongo ahau ki te tokomaha o te hunga i hiritia: kotahi rau e wha tekau ma wha nga mano i hiritia, no nga pu katoa o nga tamariki a Iharaira.
- 5
- O te pu o Hura kotahi tekau ma rua nga mano i hiritia. O te pu o Reupena kotahi tekau ma rua nga mano i hiritia. O te pu o Kara kotahi tekau ma rua nga mano i hiritia.
- 6
- O te pu o Ahere kotahi tekau ma rua nga mano i hiritia. O te pu o Nepetarima kotahi tekau ma rua nga mano i hiritia. O te pu o Manahe kotahi tekau ma rua nga mano i hiritia.
- 7
- O te pu o Himiona kotahi tekau ma rua nga mano i hiritia. O te pu o Riwai kotahi tekau ma rua nga mano i hiritia. O te pu o Ihakara kotahi tekau ma rua nga mano i hiritia.
- 8
- O te pu o Hapurona kotahi tekau ma rua nga mano i hiritia. O te pu o Hohepa kotahi tekau ma rua nga mano i hiritia. O te pu o Peniamine kotahi tekau ma rua nga mano i hiritia.
- 9
- Muri iho i enei mea ka kite ahau, na, he mano tini e kore nei e taea e tetahi te tatau, no nga iwi katoa, no nga hapu, no nga huihuinga tāngata, no nga reo, e tu ana i mua i te torona i mua hoki i te Reme, he mea whakakakahu ki nga kakahu ma, he nikau ano hoki kei o ratou ringaringa;
- 10
- Nui atu to ratou reo ki te karanga i mea ratou, Te whakaoranga na to tatou Atua e noho nei i runga i te torona, na te Reme hoki.
- 11
- Me te tu ano hoki nga anahera katoa i nga taha katoa o te torona, o nga kaumatua, me nga mea ora e wha, takoto tapapa ana hoki ratou ki mua i te torona, koropiko ana ki te Atua,
- 12
- I mea, Amine: Te whakapai, te kororia, te matauranga, te whakawhetai, te honore, te mana, te kaha, kei to tatou Atua, ake ake ake. Amine.
- 13
- A ka oho mai tetahi o nga kaumatua, ka mea mai ki a au, Enei kua oti nei te whakakakahu ki nga kakahu ma ko wai ra? i haere mai hoki ratou i hea?
- 14
- Ano ra ko ahau ki a ia, E kara, e mātau ana koe. Ka mea mai ano ia ki a au, Ko te hunga tenei i haere mai i te tukinotanga nui, kua horoia hoki e ratou o ratou kakahu, he mea whakama na ratou o ratou kakahu ki nga toto o te Reme.
- 15
- Koia ratou e noho nei ki mua i te torona o te Atua, e mahi nei ki a ia i te ao i te po i roto i tona whare: a, tera e noho ra i runga i te torona, ka noho ano ia i roto i a ratou.
- 16
- Kore ake o ratou mate kai, kore ake o ratou mate wai; e kore ano hoki te ra e pa iho ki a ratou, tetahi werawera ranei.
- 17
- Ko te Reme hoki i waenganui o te torona hei whangai i a ratou, māna ratou e arahi ki nga puna wai ora: a ma te Atua e muru atu nga roimata katoa o o ratou kanohi.
Address: 
Phone: 
Email: