- 1
- A i kite ahau i te wāhanga o tetahi o nga hiri e te Reme, i rongo hoki ahau i tetahi o nga mea ora e wha e mea mai ana, ano he reo whatitiri, Haere mai kia kite.
- 2
- I kite ano ahau, na, he hoiho ma: na, te kai noho i runga he kopere tona; a i hoatu ano he karauna ki a ia: a haere atu ana ia i runga i te wikitoria ki te wikitoria ano.
- 3
- A, i tana wāhanga i te rua o nga hiri, ka rongo ahau i te rua o nga mea ora e mea ana, Haere mai kia kite.
- 4
- Na, ko te haerenga atu o tetahi hoiho he mea whero: i hoatu ano ki te kai noho i runga kia tangohia atu e ia te rangimarie i runga i te whenua, kia patu ai ratou tetahi i tetahi: i hoatu ano hoki he hoari nui ki a ia.
- 5
- A, i tana wāhanga i te toru o nga hiri, ka rongo ahau i te toru o nga mea ora e mea ana, Haere mai kia kite. A, taku tirohanga atu, na, he hoiho mangu; a, te kai noho i runga he pauna taimaha tana kei tona ringaringa.
- 6
- A rongo ana ahau i te reo i waenganui o nga mea ora e wha e mea ana, He kuata witi mo te pene, e toru kuata parei mo te pene; kei kino hoki to mahi ki te hinu me te waina.
- 7
- A, i tana wāhanga i te wha o nga hiri, ka rongo ahau i te reo o te wha o nga mea ora e mea ana, Haere mai kia kite.
- 8
- A, taku tirohanga atu, na, he hoiho ahua ma: me te kai noho i runga, tona ingoa ko te Mate, me te aru ano te Reinga i a ia. A i hoatu ano ki a raua nga tikanga ki te tuawha o nga wahi o te whenua, kia whakamatea ki te hoari, ki te mate kai, ki te mate turoro, ki nga kararehe hoki o te whenua.
- 9
- A, i tana wāhanga i te rima o nga hiri, ka kitea e ahau i raro i te āta nga wairua o te hunga i whakamatea mo te kupu a te Atua, mo ta ratou whakaaturanga hoki:
- 10
- Nui atu to ratou reo ki te karanga, i mea ratou, Kia pehea te roa, e te Ariki, he tapu he pono nei koe, ou, ka kore nei e whakawa, e rapu utu mo o matou toto, i te hunga e noho ana i runga i te whenua?
- 11
- A i hoatu ano he kakahu ma ki tenei ki tenei o ratou; ka korerotia ano hoki ki a ratou, he okiokinga mo ratou mo tetahi wa iti, kia rite ra ano o ratou hoa pononga me o ratou teina, e patua nei i nga wa i muri, e peratia me ratou nei.
- 12
- A ka kite ahau i tana wāhanga i te ono o nga hiri, na, he ru nui; kua mangu te ra, ano he kakahu taratara, mea huruhuru nei, kua rite ano te marama ki te toto;
- 13
- A taka iho ana nga whetu o te rangi ki te whenua, pera ana me te piki e whakangahoro nei i ona hua matamua, ina whakaoioia e te hau nui.
- 14
- Kua riro ke hoki te rangi, ano he pukapuka e whakakopakopaia ana; i nekehia atu ano hoki nga maunga katoa me nga motu i o ratou turanga.
- 15
- Na, nga kingi o te whenua, nga tāngata nunui, nga tāngata taonga, nga rangatira mano, nga tāngata kaha, nga pononga katoa, me nga rangatira katoa, piri ana ratou ki roto ki nga ana ki nga toka o nga maunga;
- 16
- Me te ki ake ano ratou ki nga maunga ki nga toka, E hinga ki runga ki a matou, hei huna i a matou i te kanohi o tera e noho ana i runga i te torona, i te riri hoki o te Reme:
- 17
- Kua taea hoki te ra nui o tana riri; a ko wai e tu?
Address: 
Phone: 
Email: