- 1
- Kia ngohengohe nga wairua katoa ki nga mana nunui. Kahore hoki he mana, no te Atua anake: nga mana o tenei wa nei he mea whakarite na te Atua.
- 2
- Na, ki te whakakeke tetahi ki te mana, e whakakeke ana ki ta te Atua i whakarite ai: a, ta te hunga whakakeke e whiwhi ai he whakahe.
- 3
- Ehara hoki nga rangatira i te whakawehi mo nga mahi pai, engari mo nga mahi kino. E mea ana koe kia kaua e wehi i te mana? meatia te pai, a he whakamoemiti tana e homai ai ki a koe:
- 4
- He minita hoki ia na te Atua ki a koe mo te pai. Tena ki te mahi kino koe, e wehi ra; ehara hoki tana i te mau noa i te hoari: he minita hoki ia na te Atua, he kai rapu utu hei riri i te kai mahi i te kino.
- 5
- Koia i takoto ai te tikanga kia ngohengohe koutou, ehara, i te mea he whakaaro kau ki te riri, engari ki ta te hinengaro ano hoki.
- 6
- Na konei hoki koutou i hoatu ai i te takoha: na te Atua hoki ratou minita, he hunga hoki e mau tonu ana ki tenei mea pu ano.
- 7
- Na, hoatu nga mea i tika ki te katoa: he takoha ki te tangata i tika ai te takoha; he utu ki te tangata i tika ai te utu; he wehi ki te tangata i tika ai te wehi; he honore ki te tangata i tika ai te honore.
- 8
- Kei waiho kia takoto roa ana te mea i tika kia hoatu ki tetahi, ko te aroha anake o tetahi ki tetahi: ka rite hoki te ture i te tangata e aroha ana, ki tera atu.
- 9
- Ko tenei hoki, Kaua e puremu, Kaua e patu tangata, Kaua e tahae, Kaua e whakapae teka, Kaua e hiahia ki ta te tangata; a ki te mea tera atu ano tetahi kupu ako, ka whakarapopototia ki roto ki tenei kupu, ara, Kia aroha ki tou hoa tata, ano ko koe.
- 10
- E kore te aroha e hanga kino ki tona hoa: ko te aroha hoki te whakaritenga o te ture.
- 11
- Tenei ano hoki tetahi, e mohio ana tatou ki te taima, kua taka noa ake te wa e ara ai tatou i te moe: engari hoki tenei e tata ana to tatou oranga i to te wa i whakapono ai tatou.
- 12
- Kua aua atu te po, ka tata te ao: mo konei ra kia whakarerea e tatou nga mahi o te pouri, kia kakahuria iho nga kakahu whawhai o te māramatanga.
- 13
- Kia pai ta tatou haere, kia rite ki to te awatea; kauaka i nga kakainga i nga haurangitanga, kaua i nga hē moenga i nga hiahia taikaha, kaua i te whawhai i te hae.
- 14
- Engari kakahuria iho te Ariki a Ihu Karaiti, a kaua e whakaaroa wawetia te kikokiko, kia mahia ona hiahia.
Address: 
Phone: 
Email: