- 1
- Te tangata e ngoikore ana te whakapono whakahoatia mai, kauaka ia ki nga totohenga whakaaro.
- 2
- Ta, tetahi hoki i whakapono ai me kai e ia nga mea katoa: te tangata ngoikore ia e kai otaota ana.
- 3
- Kaua te tangata e kai ana e whakahawea ki te tangata e kore e kai; kaua hoki te tangata e kore e kai e whakahe i te tangata e kai ana: kua manakohia hoki ia e te Atua.
- 4
- Ko wai koe e whakahe na i ta tera pononga? ma tona rangatira ia e whakatu e whakahinga ranei. Ina ka whakaturia ano ia: e taea hoki e te Atua te whakatu i a ia.
- 5
- Ki ta tetahi ki, nui atu tetahi ra i tetahi ra: ki ta tetahi ki, rite katoa nga ra. Kia u marire nga whakaaro a tetahi a tetahi.
- 6
- Te tangata e whakaaro ana ki te ra, he whakaaro ki te Ariki tana whakaaro; a, te tangata e kore e whakaaro ki te ra, he whakaaro ki te Ariki tana kore e whakaaro. Te tangata e kai ana, he whakaaro ki te Ariki tana kainga, e whakawhetai atu ana hoki ia ki te Atua; a, te tangata e kore e kai, he whakaaro ki te Ariki tana korenga e kai, e whakawhetai ana ano ia ki te Atua.
- 7
- Ehara hoki i te mea mona ake ano te oranga o tetahi o tatou, ehara hoki i te mea mona ake te matenga o tetahi.
- 8
- Ta te mea ahakoa ora, e ora ana tatou ki te Ariki; ahakoa mate, e mate ana ki te Ariki: na, ahakoa ora, ahakoa mate, no te Ariki tatou.
- 9
- Ko te mea hoki tenei i mate ai a te Karaiti, i ara ake ai ano, i ora ai ano, kia waiho ai ia hei rangatira mo te hunga mate, mo te hunga ora.
- 10
- Ko koe na, he aha koe i whakahe ai i tou teina? me koe na hoki, he aha koe i whakahawea ai ki tou teina? e tu katoa hoki tatou ki te nohoanga whakawa o te Karaiti.
- 11
- Kua oti hoki te tuhituhi, E ora ana ahau, e ai ta te Ariki, ina e piko katoa nga turi ki a au, a e whakaae nga arero katoa ki te Atua.
- 12
- Ae ra ka korerotia e tenei e tenei o tatou te tikanga o ana mahi ki te Atua.
- 13
- Na, kāti ta tatou whakahe tetahi i tetahi; engari ko tenei kia rite i a koutou, kia kaua e whakatakotoria he tūtukitanga waewae he whakahinga ranei mo te teina.
- 14
- E mohio ana ahau, u tonu toku whakaaro i roto i te Ariki i a Ihu, kahore he mea nona ake ano tona noa: engari ki te mea tetahi e noa ana tetahi mea, e noa ano ki a ia.
- 15
- Otiia ki te mea na te kai tou teina i pouri ai, kahore e mau ana tou haere i runga i te aroha. Kaua e whakamatea ki to kai te tangata i mate nei a te Karaiti mona.
- 16
- Na, kei korerotia kinotia ta koutou pai.
- 17
- Ehara hoki te rangatiratanga o te Atua i te kai, i te wai; engari he tika, he rangimarie, he hari i roto i te Wairua Tapu.
- 18
- Te tangata hoki ko enei hei mahinga māna ki a te Karaiti, ka manakohia ia e te Atua, ka paingia, hoki e nga tāngata.
- 19
- Na, kia whaia e tatou nga mea e mau ai te rongo, nga mea ano hoki e hangā ai te pai o tetahi o tetahi.
- 20
- Kaua e waiho te kai hei whakahoro mo ta te Atua mahi. E ma ana ano nga mea katoa; otiia e kino ana ki te tangata ki te mea he tūtukitanga waewae nei tana kainga.
- 21
- He mea pai ano kia kaua e kai kikokiko, kia kaua e inu waina, aha ranei e tūtuki ai tou teina, e hinga ai ranei, e ngoikore ai ranei.
- 22
- He whakapono tau? waiho i a koe ano ki te aroaro o te Atua. Ka hari te tangata kahore e whakahe i a ia ano, mo te mea i whakapaia atu e ia.
- 23
- Ki te ruarua ia tetahi a ka kai, kua takoto te whakahe mona no te mea ehara i te kai whakapono: he hara hoki nga mea katoa, kihai nei i puta ake i te whakapono.
Address: 
Phone: 
Email: