- 1
- Ha, kia pehea a tatou korero? Kia u tonu tatou ki te hara, kia hua ai te aroha noa?
- 2
- Kahore rapea. Ka whakatupapakutia nei tatou ki te hara, kei hea ake he nohoanga mo tatou i runga i taua hara?
- 3
- Kahore ianei koutou i mohio, ko tatou kua iriiria nei ki roto ki a Karaiti Ihu, kua iriiria ki roto ki tona matenga?
- 4
- Na, kua tanumia ngatahitia nei tatou me ia i te iriiringa ki roto ki te mate: kia rite ai ki a te Karaiti i whakaarahia ake nei i te mate e te kororia o te Matua, whaihoki ko tatou kia haere i roto i te houtanga o te ora.
- 5
- Ki te mea hoki kua whakatokia tahitia tatou ki te ahua o tona matenga, ka pera ano hoki tatou ki te ahua o tona aranga mai:
- 6
- E mohio ana hoki ki tenei, kua ripekatia ngatahitia to tatou tangata tawhito me ia, kia hemo ai te tinana o te hara, kia mutu ai ta tatou mahi ki te hara.
- 7
- Ki te mate hoki tetahi, kua mawheto ia i te hara.
- 8
- Na, ki te mea kua mate tahi tatou ko te Karaiti, e whakapono ana tatou e ora tahi ano tatou me ia:
- 9
- E mātau ana hoki tatou, ka ara nei a te Karaiti i te mate, heoi ano ona matenga; kahore he kingitanga o te mate ki a ia a mua ake nei.
- 10
- Ko tona matenga hoki, he matenga kotahi ki te hara: tona oranga ia, he oranga ki te Atua.
- 11
- Whaihoki mahara iho ki a koutou, kua whakatupapakutia koutou ki te hara, e ora ana ia ki te Atua, i roto i a Ihu Karaiti i to tatou Ariki.
- 12
- Mo konei ra aua te hara e kingi i roto i to koutou tinana mate, kei ngohengohe koutou ki ta te hara, i runga i nga hiahia o taua tinana nei.
- 13
- Kaua ano hoki e tukua o koutou wahi hei mahi hē ma te hara: engari tukua atu koutou ki te Atua, he hunga kua ora i te mate, me o koutou wahi hei mahi tika ma te Atua.
- 14
- E kore hoki te hara e waiho hei rangatira mo koutou: ehara hoki koutou i te ture, engari no te aroha noa.
- 15
- He aha koia? kia hara oti tatou, no te mea ehara tatou i te ture, engari no te aroha noa? Kahore rapea.
- 16
- Kahore oti koutou i mātau, ki te tuku koutou i a koutou ki tetahi hei pononga, he pononga koutou na tera kua ngohengohe na koutou ki tana; na te hara ranei, a mate iho, na te ngohengohe ranei, a tika ake?
- 17
- Ko tenei me whakawhetai atu ki te Atua, he pononga koutou i mua na te hara, heoi kua ngohengohe o koutou ngakau ki te ahua o te ako i whakaritea nei mo koutou.
- 18
- Na ka atea mai nei koutou i te hara, he pononga koutou na te tika.
- 19
- He kupu tangata tenei naku, na te ngoikore o to koutou kikokiko: na, i tukua o koutou wahi hei pononga ma te poke ma te tutū ki te mahi tutū; whaihoki me tuku o koutou wahi aianei hei pononga ma te tika puta ake he tapu.
- 20
- I te mea hoki he pononga koutou na te hara, e atea ana koutou i te tika.
- 21
- Na i taua wa he aha nga hua i a koutou o nga mea e whakama nei koutou? he mate hoki te mutunga o aua mea.
- 22
- Tena ko tenei ka atea nei koutou i te hara, a ka meinga hei pononga ma te Atua, nga hua ki a koutou he tapu, a, te tukunga iho he oranga tonutanga.
- 23
- Ko nga utu hoki o te hara he mate; ko ta te Atua ia i homai ai he oranga tonutanga, i roto i a Karaiti Ihu i to tatou Ariki.
Address: 
Phone: 
Email: