- 1
- Kahore ano koutou kia mātau, e aku teina, (e korero ana hoki ahau ki te hunga mātau ki te ture,) hei rangatira te ture mo te tangata i te wa e ora ai ia?
- 2
- Te wahine tāne hoki, e mau ana ano ia i te ture ki te tāne, i a ia ano e ora ana; a ki te mate te tāne, kua mawheto i te ture a te tāne.
- 3
- Na, i te oranga o te tāne, ka karangatia ia he wahine puremu, ki te riro ia i te tangata ke: tena ka mate te tāne, e atea ana ia i te ture; tē meinga he wahine puremu, ki te riro i te tangata ke.
- 4
- Me koutou ano hoki, e aku teina, kua tupapakutia ki te ture e te tinana o te Karaiti; kia riro ai koutou i tetahi atu, i whakaarahia nei i te mate, kia whai hua ai tatou ki te Atua.
- 5
- I a tatou hoki i te kikokiko, e mahi ana nga hihiritanga o nga hara, e whakaohokia nei e te ture, i roto i o tatou wahi, a hua ake ko te mate.
- 6
- Ko tenei kua mawheto mai nei tatou i te ture, i te mea ka mate nei tera i puritia ai tatou; kia mahi ai tatou i runga i te houtanga o te wairua, auaka i runga i te tawhitotanga o te kupu tuhituhi.
- 7
- Kia pehea ra he kupu ma tatou? He hara ranei te ture? Kahore rapea. Engari kihai ahau i mātau ki te hara, me i kaua te ture: kahore hoki ahau i mohio ki te hiahia, me i kaua te ture te mea mai, Aua koe e hiahia.
- 8
- I mau hoki te hara ki te ture hei whakaoho, a mahia ana nga hiahia katoa i roto i ahau. Ki te kore hoki te ture ka mate te hara.
- 9
- I ora hoki ahau i mua i te korenga o te ture: te taenga mai o te kupu ako, kua ora ano te hara, a mate iho ahau.
- 10
- Na, taua kupu ako i meinga mo te ora, kitea rawatia ake, hei whakamate tenei moku.
- 11
- I mau hoki te hara ki te kupu ako hei whakaoho, a tinihangatia iho ahau, na, mate iho ahau i a ia.
- 12
- Ae ra, e tapu ana te ture, me te kupu ako ano hoki e tapu ana, e tika ana, e pai ana.
- 13
- I meinga koia te mea pai hei mate moku? Kahore rapea. Engari na te hara, kia mohiotia ai he hara, i mea te mea pai hei mahi mate moku; no ka ai te kupu ako hei mea i te hara kia nui noa atu te hara.
- 14
- E mātau ana hoki tatou no te wairua te ture: ko ahau ia no te kikokiko, he mea hoko atu hei pārau ma te hara.
- 15
- Ko taku hoki e mahi nei kahore e maharatia iho e ahau: kahore hoki e mahia e ahau taku i pai ai; heoi taku i kino ai, meatia ana tenei e ahau.
- 16
- Na, ki te mahia e ahau taua mea pu ano kihai nei ahau i pai atu, e whakaae ana ahau ki te ture he pai.
- 17
- Ko tenei ehara i ahau i mahia ai, engari na te hara e noho nei i roto i a au.
- 18
- E mātau ana hoki ahau, kahore he mea pai e noho ana i roto i a au, ara i roto i toku kikokiko: tenei tata hoki ki ahau te hiahia; ko te mea ia i te pai e kore e kitea e au.
- 19
- Te pai hoki e hiahiatia ana e ahau, kahore e mahia e ahau: engari te kino kihai nei au i pai, mahia ana tenei e ahau.
- 20
- Na, ki te mahia e ahau taua mea pu ano kihai nei au i pai atu, ehara i a au nāna taua mea i mahi, engari na te hara e noho nei i roto i ahau.
- 21
- Na, kua kitea nei e ahau he ture, ara i ahau e hiahia ana kia mea i te pai, tata tonu mai te kino ki ahau.
- 22
- E ahuareka ana hoki ahau ki te ture a te Atua, ara to roto tangata:
- 23
- Heoi kua kitea e ahau tetahi atu ture i roto i oku wahi, e whawhai ana ki te ture o toku hinengaro, a e mea ana i a au hei taurekareka ma te ture a te hara, ma tenei i roto nei i oku wahi.
- 24
- Aue, te mate i ahau! ma wai ahau e whakaora i te tinana o tenei mate?
- 25
- Whakawhetai tonu atu ahau ki te Atua, i runga i a Ihu Karaiti i to tatou Ariki. Na, ahau ake nei ano ka mahi ko toku hinengaro ki te ture a te Atua; ko toku kikokiko ia ki te ture a te hara.
Address: 
Phone: 
Email: