- 1
- Whakatuwheratia o kuwaha, e Repanona, kia kai ai te ahi i o hita.
- 2
- E aue, e te kauri; kua hinga hoki te hita, kua pahuatia hoki nga metararahi, e aue, e nga oki o Pahana, no te mea kua riro iho te ngahere o te wahi taiepa.
- 3
- Te reo o nga hepara e aue ana; no te mea kua oti to ratou kororia te pahua! Te reo o nga kuao raiona e ngengere ana; no te mea kua oti te whakapehapeha o Horano te pahua!
- 4
- Ko te kupu tenei a Ihowa a toku Atua, Whangaia nga hipi, nga mea e patua ana.
- 5
- E patua ana hoki e nga tangata nana, kahore ano hoki a ratou whakahe ake ki ta ratou: e ki ana hoki o ratou kai hoko, Kia whakapaingia a Ihowa; kua whiwhi hoki ahau ki te taonga: kahore hoki he manawapa o o ratou hepara ki a ratou.
- 6
- E kore hoki ahau e manawapa ki nga tangata o te whenua a muri ake nei, e ai ta Ihowa: engari, na, ka tukua atu e ahau nga tangata ki te ringaringa o tona hoa, o tona hoa, ki te ringaringa ano hoki o tona kingi; a ma ratou te whenua e patu, e kore ano ahau e whakaora i roto i o ratou ringaringa.
- 7
- Ka whangaia ano e ahau nga hipi e patua ana, nga mea iti ano o te kahui. I tikina ano e ahau etahi tokotoko e rua maku, tapā iho e ahau tetahi Ko Ataahua, tetahi atu tapā iho e ahau, Ko Nga-paihere; kei te whangai ahau i nga hipi.
- 8
- He mea hatepe atu ano naku nga hepara tokotoru i te marama kotahi, a whakarihariha ana toku wairua ki a ratou, o ratou wairua ano hoki whakarihariha ana ki a au.
- 9
- Katahi ahau ka ki atu, E kore koutou e whangaia e ahau: Te mea mo te mate, kia mate, a te mea e hatepea kia hatepea; kia kai ano hoki nga toenga i nga kikokiko o tona hoa, o tona hoa.
- 10
- Na, kua mau ahau ki taku tokotoko ki a Ataahua, tapahia putia ana e ahau, he whakatakanga i taku kawenata i whakaritea e ahau ki nga iwi katoa.
- 11
- Na, kua whakatakā i taua rangi; a mohio tonu iho nga mea iti o te kahui i tatari ki a au, na Ihowa taua kupu.
- 12
- I mea ano ahau ki a ratou, Ki te mea e pai ana ki ta koutou titiro, homai taku utu; a ki te kahore, kauaka. Na, paunatia mai ana taku utu e ratou, e toru tekau nga hiriwa.
- 13
- Na, ko te kianga mai a Ihowa ki a au, makā atu ki te kai hanga rihi te utu pai i whakaritea moku e ratou. Na, ka mau au ki nga hiriwa e toru tekau, a makā atu ana e ahau ki te kai hanga rihi ki te whare o Ihowa.
- 14
- Katahi ka tapahia putia e ahau te rua o oku tokotoko, ara, a Nga-paihere, kia kore ai te tuakanatanga o Hura ki a Iharaira.
- 15
- Ki mai ano a Ihowa ki a au, Tikina ano etahi mea a te hepara wairangi māu.
- 16
- No te mea, na, ka ara i a au tetahi hepara i te whenua, he tangata e kore e tirotiro i nga mea ka motuhia atu, e kore ano e rapu i te kuao, e kore ano e rongoa i te mea he whati tona, e kore ano e whangai i te mea e tu ana: engari ka kainga e ia te kikokiko o te mea momona, o ratou matikuku ano hoki titaritari rawa e ia.
- 17
- Aue te mate mo te hepara ko te ahua kau tona, e whakarere ana i nga hipi! ka pa te hoari ki tona ringaringa, ki tona kanohi matau ano: ka memenge rawa tona ringaringa, ka whakapouritia rawatia ano hoki tona kanohi matau.
Address: 
Phone: 
Email: