- 1
- Te poropititanga, he kupu na Ihowa mo Iharaira, e ai ta Ihowa, nana nei nga rangi i hora, nana te whenua i whakatu, a whakawhaiahuatia ana e ia te wairua o te tangata i roto i a ia.
- 2
- Tenei au te mea nei i a Hiruharama hei kapa wiri ki nga iwi katoa i tetahi taha, i tetahi taha; ka whawhai ano hoki ki a Hura i te whakapaenga, ki a Hiruharama ano hoki.
- 3
- Na, i taua rangi ano ka meinga e ahau a Hiruharama hei kohatu taimaha ki nga iwi katoa: te hunga katoa e hapai ana ka poutoutokia rawatia, me nga iwi katoa o te whenua e huihui mai ana ki te whawhai ki a ia.
- 4
- I taua rangi, e ai ta Ihowa, ka patua e ahau ki te miharotanga nga hoiho katoa, o ratou kai eke ano hoki ki te haurangi: ka titiro matatau atu ano hoki oku kanohi ki te whare o Hura, ka patu ano e ahau nga hoiho katoa o te iwi ki te matapotanga.
- 5
- A ka mea nga rangatira o Hura i roto i o ratou ngakau, Ko nga tangata o Hiruharama hei kaha moku i runga i to ratou Atua, i a Ihowa o nga mano.
- 6
- I taua rangi ka meinga e ahau nga rangatira o Hura kia rite ki te kānga ahi i roto i nga rakau, kia rite ano ki te rama ahi i roto i te paihere, ka pau hoki i a ratou nga iwi katoa i te taha matau, i te taha maui, a karapoi noa; a tera a Hiruharama e nohoia ano i runga i tona turanga, ara, i Hiruharama.
- 7
- Ka whakaora ano hoki a Ihowa i nga teneti o Hura i te tuatahi, he mea kei whakapehapeha te kororia o te whare o Rawiri, te kororia ranei o nga tangata o Hiruharama ki a Hura.
- 8
- I taua rangi ka tiakina e Ihowa nga tangata o Hiruharama; a te tangata ngoi-kore i roto i a ratou ka rite i taua ra ki a Rawiri; ka rite ano hoki te whare o Rawiri ki te Atua, ki te anahera a Ihowa i to ratou aroaro.
- 9
- I taua rangi ano ka whai ahau kia whakangaromia nga iwi katoa e haere mai ana ki te whawhai ki a Hiruharama.
- 10
- Ka ringitia ano e ahau te wairua o te aroha noa, o nga inoi ki runga ki nga tangata o Hiruharama, a ka titiro ratou ki a au ki ta ratou i wero ai, ka tangi ano ki a ia, me te mea e tangi ana ki te huatahi, ka pouri ano ki a ia, me te mea e pouri ana ki te tamaiti matamua.
- 11
- I taua rangi ka nui te tangihanga i roto i a Hiruharama, ka rite ki te tangihanga i Hararimono i te raorao o Mekirono.
- 12
- A ka tangi te whenua, tenei hapu, tenei hapu, wehe rawa, te hapu o te whare o Rawiri wehe rawa, a ratou wahine wehe rawa, te hapu o te whare o Natana wehe rawa, me a ratou wahine ano, wehe rawa,
- 13
- Te hapu o te whare o Riwai wehe rawa, a ratou wahine wehe rawa, te hapu o Himei, me a ratou wahine ano, wehe rawa,
- 14
- Nga hapu katoa e toe ana, tenei hapu, tenei hapu, wehe rawa, me a ratou wahine ano, wehe rawa.
Address: 
Phone: 
Email: