- 1
- Na, ka hoki mai te anahera i korero ra ki a au, a whakaarahia ana ahau e ia, peratia ana ahau me te tangata e whakaarahia ana i a ia e moe ana.
- 2
- I mea ano ia ki a au, Ko te aha e kitea ana e koe? Ano ra ko ahau, I te titiro atu ahau, na, ko tetahi turanga rama, he koura katoa, me tetahi peihana i tona pito ki runga, e whitu ano hoki ona rama, e whitu ano nga korere o nga rama e whitu, i tona pito ki runga.
- 3
- E rua ano hoki nga oriwa i tona taha, tetahi i te taha ki matau, tetahi i tona taha ki maui.
- 4
- Katahi ahau ka oho atu, a ka mea atu ki te anahera i korero mai ki a au, i mea atu ahau, He aha enei, e toku ariki?
- 5
- Na, ka oho mai te anahera i korero mai ra ki a au, a ka mea ki a au, Kahore ranei koe e mohio ko te aha enei? Ano ra ko ahau, Kahore, e toku ariki.
- 6
- Na ka oho mai ia, a ka mea ki a au; i ki ia, Ko te kupu tenei a Ihowa, ki a Terupapere, e ki ana, Ehara i te mea ma te uaua, ma te kaha, engari ma toku wairua, e ai ta Ihowa o nga mano.
- 7
- Ko wai koe, e te maunga nui? I te aroaro o Terupapere ka meinga koe kia papatairite: ka whakaputaina ano e ia te kohatu o runga rawa, me te pa ano nga karanga, He pai, he pai mona.
- 8
- I puta mai ano te kupu a Ihowa ki a au, i mea,
- 9
- Na nga ringaringa o Terupapere i whakatakoto te turanga mo tenei whare, ma ona ringa ano e whakaoti; a ka mohio koe na Ihowa o nga mano ahau i unga mai ki a koutou.
- 10
- Ko wai hoki tenei i whakahawea nei ki te ra o nga mea ririki? ka koa ano ratou, a ka kite i te kohatu paramu, i roto i te ringaringa o Terupapere, enei e whitu; ko nga kanohi enei o Ihowa e kopikopiko ana, a puta noa i te whenua.
- 11
- Katahi ahau ka whakahoki atu, a ka mea ki a ia, He aha ena oriwa e rua i te taha ki matau o te turanga rama, i te taha ano ki maui?
- 12
- I oho atu ano ahau, i mea ki a ia, He aha nga manga oriwa e rua, e rua nei o raua korere koura i rere atu ai te hinu koura i roto i a raua?
- 13
- Katahi tera ka korero mai ki a au, ka mea, Kahore ranei koe e mohio ko te aha enei? Ano ra ko ahau, Kahore, e toku ariki.
- 14
- Na, ka ki mai ia, Enei e rua ko nga tangata kua oti te whakawahi, a e tu ana i te taha o te Ariki o te whenua katoa.
Address: 
Phone: 
Email: