- 1
- Na, i puta mai te kupu a Ihowa ki a Hona, tama a Amitai, i mea,
- 2
- Whakatika, haere ki Ninewe, ki taua pa nui, karangatia atu hoki te he mona; kua tae ake hoki to ratou kino ki toku aroaro.
- 3
- Ko Hona ia i whakatika, i rere ki Tarahihi i te aroaro o Ihowa, haere ana ia ki raro ki Hopa; a ka kitea e ia tetahi kaipuke e rere ana ki Tarahihi, ka hoatu e ia te utu mo te ekenga ki runga, he mea kia rere ngatahi ai ratou ki Tarahihi i te aroaro o Ihowa.
- 4
- Na, ka tukua e Ihowa he hau nui ki te moana, a he nui te awha i te moana, no ka kīa ka pakaru te kaipuke.
- 5
- Na, ka wehi nga kai whakatere, ka karanga ratou ki tona atua, ki tona atua, a akiritia atu ana e ratou nga taonga o runga o te kaipuke ki te moana kia māmā ai i te mea ka riro aua mea. Ko Hona ia kua riro ki raro ki nga taha o te kaipuke, a takoto ana, au tonu tana moe.
- 6
- Na, ko te haerenga mai o te rangatira o te kaipuke, ka ki mai ki a ia, He aha tau e moe? maranga, karanga ki tou Atua, me kahore tou Atua e whakaaro mai ki a tatou, kei ngaro tatou.
- 7
- Na, ka mea ratou ki tona hoa, ki tona hoa, Haere mai, kia makamaka rota tatou, kia mohio ai tatou na wai te take i pa ai tenei he ki a tatou. Na, kei te makamaka rota, a ka tau te rota ki a Hona.
- 8
- Katahi ratou ka mea ki a ia, Tena ra, whakaaturia ki a matou na wai te take i pa ai tenei he ki a tatou? he mahi aha tau? i haere mai ano hoki koe i hea? Ko hea to whenua? no tehea iwi ano hoki koe?
- 9
- Na, ko tana meatanga mai ki a ratou, He Hiperu ahau, a e wehi ana i a Ihowa Atua o nga rangi, nana nei i hanga te moana me te whenua maroke.
- 10
- Na, nui atu te wehi i wehi ai aua tangata, ka mea ratou ki a ia, He aha tenei i meatia ai e koe? I mohio hoki aua tangata e rere ana ia i te aroaro o Ihowa, nana hoki i whakaatu ki a ratou.
- 11
- Na, ko ta ratou meatanga ki a ia, Me aha matou ki a koe, kia marino ai te moana ki a tatou? e nui haere ana hoki te ngaru o te moana.
- 12
- Katahi tera ka mea ki a ratou, Hapainga ake ahau, makā hoki ahau ki te moana, katahi ka marino te moana ki a koutou; e mohio ana hoki ahau he whakaaro ki a au i puta mai ai tenei paroro ki a koutou.
- 13
- Heoi hoe tonu aua tangata kia u ai ki uta; otiia kihai i taea: e nui haere ana hoki te ngaru o te moana hei arai i a ratou.
- 14
- Katahi aua tangata ka karanga ki a Ihowa, a ka mea, Aue, e Ihowa, kaua ra matou e whakangaromia hei utu mo te matenga o tenei tangata: kaua ano hoki e utaina te toto hara-kore ki runga ki a matou: kua mahia na hoki e koe, e Ihowa, tau i pai ai.
- 15
- Na, hapainga ana a Hona e ratou, makā atu ana ki te moana: a mutu ake te riri o te moana.
- 16
- Na, he nui te wehi i wehi ai aua tangata i a Ihowa, patua iho e ratou he patunga tapu ki a Ihowa, puaki ana a ratou kupu taurangi.
- 17
- Na, kua rite mai i a Ihowa tetahi ika nui hei horo mo Hona. A e toru nga ra, e toru nga po o Hona i roto i te kopu o te ika.
Address: 
Phone: 
Email: