- 1
- Na ka korero a Ihowa ki a Hohua, ka mea,
- 2
- Korero atu ki nga tamariki a Iharaira, mea atu, Whakaritea etahi pa whakaora, aku i korero ai, a Mohi hoki i whakapuaki atu ai ki a koutou:
- 3
- Hei rerenga atu mo te tangata whakamate i patu nei i tetahi tangata, he mea urupa, ehara i te mea totika: a ka waiho hei whakaora mo koutou, kei mate i te kai takitaki toto.
- 4
- A ka rere atu ia ki tetahi o enei pa, a ka tu ki te kuwaha o te keti o te pa, na ka korerotia e ia ana korero ki nga taringa o nga kaumatua o tena pa, a ka tangohia atu ia e ratou ki roto ki te pa, ki roto ki a ratou, a ka homai he wahi e ratou ki a a ia, a ka noho ia ki a ratou.
- 5
- A ki te whaia atu ia e te kai takitaki toto, kaua e tukua atu te tangata whakamate e ratou ki tona ringa; no te mea hoki ehara i te mea totika tana patunga i tona hoa, kihai ano hoki ia i kino ki a ia i mua ake.
- 6
- Engari me noho ia ki taua pa, kia tu ra ano ia ki mua i te whakaminenga whakawakia ai, a kia mate ra ano te tino tohunga o aua ra: ko reira hoki ai te tangata whakamate, haere ai ki tona pa, ki tona whare hoki, ki te pa i rere mai nei ia i reira.
- 7
- Katahi ka whakatapua e ratou a Kerehe i Kariri i Maunga Napatari, a Hekeme i Maunga Eperaima, me Kiriata-arapa, ara, a Heperona i Maunga Hura.
- 8
- A i tera taha o Horano i te wahi e tata ana ki Heriko, i te taha ki te rawhiti ka whakaritea e ratou ko Petere i te koraha i te mānia, no te iwi o Reupena, ko Ramoto i Kireara, no te iwi o Kara, ko Korana hoki i Pahana, no te iwi o Manahe.
- 9
- Ko nga pa enei i whakaritea mo nga tamariki katoa a Iharaira, mo te manene hoki e noho ana i roto i a ratou, hei rerenga atu ma nga tangata katoa i whakamatea ai tetahi tangata, he mea urupa, kei mate i te ringa o te kai takitaki toto; kia tu ra ano i mua i te whakaminenga.
Address: 
Phone: 
Email: